Epstein-málið: Norsk sendikvinna leggur frá sær

Norska sendikvinnan í Jordan, Mona Juul, hevur gjørt av at leggja frá sær, tí hon hevur havt samband við Jeffrey Epstein.

Tað sigur norska uttanríkisráðið í tíðindaskrivi.

- Tað er ein røtt og neyðug avgerð. Hon er tikin í samráð við uttanríkisráðið eftir samrøður hesa vikuna. Sambandið hjá Monu Juul við Epstein, sum hevur forbrotið seg kynsliga, vísir vantandi dømievni, sigur Espen Barth Eide, uttanríkisráðharri.

Mona Juul fór til hús í síðstu viku meðan uttanríkisráðið kannaði samband hennara við Epstein. Og nú er greitt, at hon kemur ikki aftur til arbeiðis sum sendikvinna, skrivar norska kringvarpið.

Espen Barth Eide

Kanningin, sum nú verðiur gjørd, verður grundarlag fyri avgerðini um tað skal hava aðrar avleiðingar fyri starvið hjá Monu Juul í uttanríkisráðnum.

Norski uttanríkisráðharrin, Espen Barth Eide, sigur, at hetta málið er ein stórur trupulleiki fyri umdømi Noregs.

Sum skilst stendur í Epstein-skjølunum, at bæði børnini hjá Monu Juul og Terje Rød-Larsen skuldu arva fimm milliónir dollarar í part. Sakførarin hjá Monu Juul sigur, at fyrrverandi sendikvinnan kann ikki verja seg, men at hon fer at halda fram at samstarva við norska uttanríkisráðið.