Sjey fólk deyð av skottilburði í kanadiskum skúla

Sjey fólk vóru dripin á einum skúla í býnum Tumbler Ridge í kanadiska landspartinum British Columbia í nátt okkara tíð.

Tvey onnur fólk vóru funnin deyð í einum húsum nærindis. 

Ein kvinna, sum er undir illgruna fyri at vera gerningskvinnan, var funnin deyð fyri egnari hond inni í skúlanum. Løgreglan hevur ikki eyðmerkt gerningskvinnuna og hevur heldur einki sagt um, hví skotið var á skúlanum.

Løgreglan í Kanada sigur, at fleiri enn 25 fólk særd. Tað stendur um lív hjá tveimum teirra, sum vóru flutt á sjúkrahús við tyrlu.

Tað er sjáldsamt at skotið verður á skúlum í Kanada.   

175 næmingar

Býurin Tumbler Ridge er meiri enn 1.000 kilometrar norðan fyri Vancouver, og nærindis markinum til Alaska. 175 næmingar ganga á skúlanum. 

Borgarstjórin í Tumbler Ridge, Darryl Krakowka, sigur, at alt nærsamfelagið er í sorg. 

- Tað er oyðileggjandi at hoyra, hvussu nógv eru deyð í einum samfelagi, sum telur 2700 fólk, segði hann. 

 - Eg havi búð her í 18 ár, segði Krakowka, og legði aftrat:

- Eg kenni helst hvønn einasta av teimum deyðu.