Síðuskrúvurnar á Smyrli rigga væl

Tað kostaði 22 milliónir og 750.000 krónur at seta tvær nýggjar síðuskrúvur í Smyril og styrkja afturskipið.

Nú eru ristingarnar í skipinum nógv minni, tá tað leggur at og fer frá bryggju.

Men streymveitingarskipanin hjá síðuskrúvunum gevur frekvensórógv á eldávaringarskipanina.

Ikki ber til at siga, nær tað brekið verður rættað.

Men einki samband er millum avlýsingarnar hjá Smyrli herfyri og tekniskar trupulleikar.

Tað sigur Ruth Vang, landsstýriskvinna.

Helgi Abrahamsen, løgtingsmaður, spurdi um nýggju síðuskrúvurnar hjá Smyrli.

Sambært Strandfaraskipum landsins virka tær eftir ætlan, svara Ruth Vang.