Iran: Góðir møguleikar fyri diplomatiskari loysn við USA

Iranski uttanríkisráðharrin, Abbas Araghchi, heldur, at góðir møguleikar eru fyri at fáa diplomatiska loysn við USA í kjarnorkuspurninginum.

Ætlanin er, at iranski uttanríkisráðharrin og serligi sendimaðurin hjá Donald Trump, forseta, Steve Witkoff, skulu hittast í Geneve hósdagin.

Tað segði Araghchi í samrøðu við CBS News í gjár.

USA krevur, at Iran tekur undir við nýggjari kjarnorkuavtalu, og Trump hevur hótt við at brúka hermegi, um landið ikki tekur undir við hesum.

Sambært óváttaðum fráboðanum krevur USA, at Iran sleppur allari sínari kjarnorkuætlan.

Leiðslan í Teheran heldur fast um, at hon hevur allan rætt til at hava sivila kjarnorkuætlan og vissar um, at landið ongar ætlanir hevur um at menna kjarnorkuvápn.