Vinnuhúsið: Uttan útlendingar hevði búskapurin verið tvær mia. minni

Vinnuhúsið heldur, at kjakið um útlendsk arbeiðsfólk er vorðið óneyðuga hvast.

Uttan útlendska arbeiðsmegi vantaðu 2.400 fólk á arbeiðsmarknaðinum í Føroyum.

Virki og almennir stovnar høvdu noyðst at minka virksemið ella givist heilt, skrivar Vinnuhúsið.

Tað skrivar eisini, at búskapurin hevði verið tvær milliardir krónur minni.

Úrslitið hjá almennu kassunum hevði versnað 400 mió. kr. um árið.

Útlendingalógin skal hava góðar og greiðar møguleikar

Vinnuhúsið heldur, at tað er avgerandi fyri vælferðina og savningarmegina, at útlendingalógin gevur góðar og greiðar møguleikar at manna størvini í Føroyum. 

Hetta samsvarar eisini við politisku málini í samgonguskjølum seinastu árini.

Á summum økjum er brúk fyri at gera lógina meira smidliga. Á øðrum økjum skal hon gerast strangari, heldur Vinnuhúsið.

Tað nevnir krav um revsiváttan og kravda arbeiðstímatalið hjá útlendingum.

Nú er ósakligur munur á fólki úr ES og fólki úr triðjalondum.

Vinnuhúsið nevnir eisini krøvi um familjusamanføring, varandi uppihaldsloyvi og møguleikan fyri at taka annnað arbeiði.