Løgtingsval: 29 mál eru dottin burtur

Tá løgmaður avgjørdi at skriva út løgtingsval í gjár, duttu nógv uppskot burtur, sum skuldu viðgerast í tinginum.

Talan er um tilsamans 29 uppskot, og av teimum átti landsstýrið 20. 

Eitt av stórmálunum, sum eru dottin burtur, er veðurlagslógin, sum var til 1. viðgerð 9. desember. Henda lógin skuldi seta seta bindandi veðurlagsmál fyri Føroyar. 

Onnur lógaruppskot, sum eru dottin burtur, eru m.a. barnaverndarlógin, har ætlanin var at hækka samsýning til fosturforeldur, eitt ríkislógartilmæli um at broyta útlendingalógina, eftirlønarlógin um at byrja útgjald av eftirlønarsamansparing, áðrenn almenna fólkapensjónsaldurin, til fólk, sum fáa framskundaða ella pensjón ella fyritíðarpensjón.

Okkurt var á gáttini at verða lagt fram, men náddi ikki so langt.

Barnalógin kom ikki í tingið

Vit hava spurt okkum fyri hjá lógartænastuni í landsstýrinum, hvørji uppskot vóru á veg niðan í tingið, nú seinastu framløgudagur nærkaðist. Men lógartænastan vil ikki gevur okkum innlit í hetta, tí talan er um lógarfyrireikandi arbeiði, verður sagt.

Men hyggja vit í listan av málum, sum eru til hoyringar, og freistin er farin, so eru nøkur stórrmál.

Eitt er barnalógin, sum er eitt mál, ið fylti serliga nógv hjá Javnaðarflokkinum og Djóna Nolsøe Joensen, landsstýrismanni.

Hoyringarfreistin fór 4. februar, men málið kemur so ikki í tingið í hesum umfari.