Uppskot um grindadráp strandaði í vinnunevndini - og datt burtur

At løgtingsnevndirnar ikki altíð megna at halda freistir ger, at stórir spurningar ikki vera svaraðir.

Freistin at koma við áliti um eitt mál er ein mánaður.

At vinnunevndin verri enn so heldur hana ger, at spurningurin um grindadráp og lógina um djóravælferð verður ikki svaraður enn á sinni.

Tingmenn úr øllum flokkum komu fyrst í desember í fjør við uppskoti til samtyktar um tað, sum teir kalla at verja rættin at veiða villini djór.

Teir biðja landsstýrið broyta lóggávuna soleiðis, at bara grindalógin er galdandi fyri grindadráp. Ikki lógin um djóravælferð.

Liggur enn í vinnunevndini

Tað uppskotið er enn í vinnunevndini, hóast freistin at koma við áliti var 10. januar. 

Og sambært heimasíðuni hjá vinnunevndini hevur nevndin ikki biðið um longda freist.

Og nú val verður, dettur málið burtur. 

Sýslumaður og grindamenn eru skuldsettir fyri at bróta lógina um djóravælferð í einum grindadrápi í Hvannasundi í fjør summar.

Politiið kannar enn tað málið, so skuldsetingarnar standa við.