Flúgvandi Óli gav GOG góða byrjan í endaspælinum

Óli Mittún var stórspælandi, tá GOG vann á Skjern í endaspælinum í bestu donsku hondbóltsdeildini.

Føroyska landsliðsstjørnan skeyt átta mál upp á átta royndir og átti næstseinastu hond á øðrum átta málum hjá teimum reyðu og gulu.

Tað sá annars einki serligt út í fyrra hálvleiki, og Skjern var frammanfyri 19-14 í steðginum.

GOG setti meir ferð á spælið í seinna hálvleiki, og tá eitt lítið korter var eftir var javnleikur. Síðstu løtuna var meir eftir í tanganum hjá Óla Mittún og teimum, og GOG vann 35-34.

Fjónliðið, sum fekk eitt stig við sær úr grundspælinum, er nú fremst í bólki 1 í endaspælinum frammanfyri Aalborg, sum tapti sín fyrsta dyst fyri Fredericia.