Forkvinnan í Heilsuhjálparafelagnum fegnast: "Okkara ynskir eru hoyrd"

- Týdningurin av fakfeløgum verður viðurkendur í samgoguskjalinum.

Tað sigur Mary Antonsdóttir, forkvinna í Heilsuhjálparafelag Føroya, sum fegnast um, at fleiri av ynskjunum áðrenn valið, eru vorðin partur av nýggja samgonguskjalinum millum Fólkaflokkin, Sambandsflokkin og Javnaðarflokkin. 

Nøkur av teimum ynskjunum sum Heilsuhjálparafelagið fegnast um, er eitt nú, at samgongan vil virka fyri, at fleiri velja størv í umsorganar- og røktarøkinum.

Stutta arbeiðsvikan enn ein møguleiki

Eisini verður tað í samgonguskjalinum latið upp fyri, at man í samráðingum við fakfeløg eigur at verða opin fyri møguleikanum at stytta arbeiðsvikuna.

At stytta arbeiðsvikuna var tó eisini ásett í samgonguskjalinum hjá undanfarnu samgongu, men forkvinnan í Heilsuhjálparafelagnum vónar, at orðingin hesaferð verður til veruligar broytingar, tí tørvurin er stórur á heilsu- og umsorganarøkinum.   

Lagt verður eisini upp til, at styrkja samstarvið millum arbeiðsgevarar, fakfeløg og myndugleikar í sonevnt trípartasamstarv. 

Ætlan at pilka við verkfalsrættin

Tað er tó ikki alt sum tey fegnast.

Í samgonguskjalinum er eisini ásett, at samgongan í samráðingum við fakfeløg skal gera skipanir, sum fyribyrgja, at lív og heilsa koma í vanda undir verkfalli.

Men tað fellur ikki í góða jørð hjá forkvinnuni í Heilsuhjálparfelagnum.