Hava selt meira enn fýra kilo av kokaini í Føroyum

Løgreglan handtók í gjárkvøldið tveir ungar menn, 22 og 23 ára gamlir, og eina 19 ára gamla kvinnu í Havn, og skuldsetti tey fyri at hava smuglað í minsta lagið fimm kilo av kokaini til Føroya, og síðani at hava selt meginpartin av rúsevnunum her.

Talan er um størstu nøgdina av kokaini higartil í einum einstøkum løgreglumáli í Føroyum.

Tey trý sita í løtuni  til grundlógaravhoyring í Føroya Rætti, har Katrin Thorsvig Hansen, høvuðsákæri, hevur biðið um, at tey trý verða varðhaldsfongslað, meðan løgreglan ger fleiri kanningar.

Smuglingin byrjaði í í september

Sambært skuldsetingunum, sum ákærin las upp, skulu tey trý í tíðarskeiðnum september í fjør til 16. apríl í ár hava staðið fyri at smugla í minsta lagi fimm kilo av kokaini til Føroya. 

Hetta hava tey sambært skuldsetingunum gjørt saman, ella í felags forstáilsi og saman við øðrum persónum í Danmark og møguliga eisini í Føroyum. 

Síðan hava tey selt 4.437 gramm av kokaininum í Føroyum, og løgreglan hevur lagt hald á 666 gram.

Lótu hurðarnar aftur

Hvussu leingi, høvuðsákærin vil hava tey skuldsettu at sita í varðhaldi, kom ikki fram, áðrenn Halla Djurhuus, dómari, eftirlíkaði ynskinum hjá ákæranum um, at grundlógaravhoyringin skuldi verða fyri afturlatnum hurðum.

Dómarin eftirlíkaði eisini umbønini hjá teimum trimum verjunum um at seta forboð fyri at nevna nøvnini á teimum skuldsettu. 

Verjar eru advokatarnir Óla Jákup Kristoffersen, Jens Andrias Vinther og Jógvan Elias Winther Poulsen.