Rúsevni koma nú undir føroyskt málsræði

Málsøkið rúsevnismál kemur nú undir føroyskt málsræði.

Beinir Johannesen, løgmaður, hevur skotið upp at yvirtaka málsøkið, hóast tað longu nú verður umsitið og í høvuðsheitum fíggjað av føroyskum myndugleikum.

Verður uppskotið samtykt, fáa føroyskir myndugleikar møguleika at regulera økið við løgtingslóg, og harvið betri møguleika at skipa henda partin av heilsuverkinum við atliti at serligum føroyskum viðurskiftum, verður sagt í viðmerkingunum til uppskotið. 

Viðvíkjandi rúsevnum er alneyðugt, at nýggj rúsandi evni stundisliga vera sett á listan yvir evni, ið einans kunnu nýtast til medisinsk og vísindalig endamál, sigur løgmaður.

Av tí at málsøkið er felagsmál, tekur drúgva tíð at fáa broytt kunngerð um rúsandi evni, so at nýggj rúsandi evni koma á listan yvir evni, ið einans kunnu nýtast til medisinsk og vísindalig endamál.

Skjótari dagføring

Heilsu-og orkumálaráðið metir, fáa føroyskir myndugleikar ábyrgdina av málsøkinum, verður tað lættari og skjótari at dagføra galdandi kunngerð um rúsandi evni.

Viðvíkjandi rúsevnum er alneyðugt, at nýggj evni stundisliga vera sett á listan yvir evni, ið bara kunnu nýtast til medisinsk og vísindalig endamál.

Sambært uppskotinum skal málsøkið koma á føroyskar hendur 1. januar næsta ár. 

Les alt uppskotið her.

Samstundis sum løgmaður hevur lagt fram uppskotið um at yvritaka málsøkið rúsevni, hevur Eyðdis Hartmann Niclasen, lagt fram uppskot um at flyta myndugleikan, í sambandi við at málsøkið kemur á føroyskar hendur.