Lundastovnurin í framgongd

Í okkurt um fimtan ár er fuglateljing farin fram í Mykinesi, og gongdin vísir, at lundastovnurin er í framgongd. 

Men soleiðis hevur tað ikki altíð verið, sigur Jón Aldará, lívfrøðingur á Tjóðsavninum.

Sambært honum hevur stovnsstøddin sveiggjað nakað. Ta fyrstu tíðina sá svart út, men seinastu tíðina hava vit altso sæð tølini kvinka uppeftir, og sum heild sær betri út nú enn árini frammanundan.

- Tað er trupult at siga hví, men tað kann millum annað hava tilknýti til tað æti, sum fuglurin hevur á sjónum. 

Eisini færri fólk á hólminum kann hava sína ávirkan, sigur Jón Aldará. Tí í fleiri ár hava ferðafólk ikki havt atgongd út á hólmin, og tað kann hava gjørt sítt fyri positivu gongdina.

- Tað hjálpir lundanum í ein ávísan mun at sleppa inn í holurnar og fáa frið at reiðrast.

Men hóast stovnurin hevur viðferð sum er, so er tað ov tíðliga at gleða seg, spyrt tú Jón Aldará.

- Fyri nøkrum ára tíggjum síðan, og kanska serliga afturi í fimti og seksti árunum, tá var ein stórur hópur av lundi her úti, og tað er tað so avgjørt ikki nú.

So um gongdin er vend, tað er ov tíðliga at siga, sigur Jón Aldará.