Revsimál um frælsistøku tikið uppaftur í rættinum

Eitt revsimál móti einum manni, sum er føddur í 1998, heldur fram í Føroya rætti í dag.

Tað var í rættinum í november í fjør.

Tá tað var komið rættiliga langt, gjørdi verjin vart við, at ákærdi maðurin ikki er egnaður at vera revsaður á vanligan hátt.

Tá so er, skulu dómsmenn vera við í viðgerðini í rættinum, so málið má ganga umaftur.

Kravið hjá ákæruvaldinum verður viðgerðardómur.

Vardi í tveir tímar

Maðurin er ákærdur fyri at halda aftur tveimum kvinnum í einum kamari í einum gistingarhúsi í Havn.

Frælsistøkan vardi, sambært ákæruritinum, í tveir tímar.

Maðurin er eisini ákærdur fyri at hava sligið aðra kvinnuna og sparkað hina. 

Og hann er ákærdur fyri at hótta tær eftir lívinum.

Maðurin, sum noktar seg sekan, er haraftrat ákærdur fyri at hava gjørt herverk í kamarinum.