Kommunur kunnu taka meira í tænastugjaldi fyri býli

Hámarkið fyri tænastugjald á tóm býli verður 8.426 kr. fyri hvørt býli næsta ár.

Tað kunnger Fíggjarmálaráðið.

Í ár er hámarkið 7.945 kr.

Sambært lóg kunnu kommunur krevja tænastugjald fyri tóm býli.

Tað gera nakrar kommunur longu nú.

Og aðrar hava boðað frá, at tær ætla at gera tað.

Sambært lógini er tænastugjaldið fyri útreiðslur hjá kommununi fyri vatnveiting, at beina burtur kloakkvatn og húsarhaldsburturkast og fyri brunatilbúgving.