Malaga sleppur ikki at spæla ímóti Føroyum

Eftir ætlan skuldi føroyska landsliðið, sum í løtuni er á venjingarlegu í Mijas í Suður-Spania, spæla venjingardyst móti spanska La Liga felagnum Malaga í morgin.

Men hesin dystur er nú avlýstur, tí spanska fótbóltssambandið hevur sett forboð fyri, at dysturin verður spældur.

Spanska landsliðið spælir í morgin venjingardyst móti Italia á heimavølli, og spanska fótbóltssambandið vil ikki, at nakað annað landslið spælir dyst í Spania samstundis.

Fsf.fo skrivar, at dysturin millum Føroyar og Malaga var annars avtalaður fyri rúmari tíð síðani, og tað eru altjóða góðkend umboðsfólk, ið hava tikið sær av at fingið dystin í lag.

Men nú eru boð komin frá spanska fótbóltssambandinum, at Føroyar og Malaga ikki sleppa at spæla í morgin.