Veiðigjaldið fyri makrel og sild hækkar

20.mai fer Fiskivinnuráðið at viðgera uppskotið hjá Fiskimálaráðnum um at hækka veiðigjaldið fyri makrel og norðhavssild.

Ráðið hevur ikki fingið málið enn, men Jóanna Djurhuus, forkvinna, sigur, at hon hevur fingið at vita, at uppskotið er á veg. Og tað er sett á skránna fyri fundin hjá Fiskivinnuráðnum tann 20.mai.

Uppskotið, sum Fiskimálaráðið hevur fingið frá makrelbólkinum sonevnda, er at hækka veiðigjaldið fyri makrel 25 oyru, úr 75 oyrum upp í eina krónu, og úr 35 oyrum upp í 50 oyru fyri norðhavssildina. 

Avreiðingargjaldið verður óbroytt, tvær krónur fyri kilo, tá landað verður uttanlands ella til móttøkuskip. Hjá heimaflotanum er avreiðingargjaldið tó eina krónu fyri kilo.