Sildastovnurin betri fyri enn hildið

Trý norsk skip kannaðu sildastovnin í tvær vikur, og kanningarnar endaðu týsdagin.

Kanningar vóru gjørdar frá leiðini við Ålesund, og endaðu norðalaga. Og allastaðni var sild at síggja, sigur Aril Slotte.

Nú skulu kanningarnar hjá skipunum samansjóðast, og seinast í februar verður úrslitið almannakunngjørt.

Aril Slotte sigur at hann var ovfarin av kanningunum, tí ført hevur verið fram, at sildastovnurin er minkaður skjótt, og av tí sama er samlaða kvotan av sild lækkað seinastu árini.

Fiskaren skrivaði herfyri, at fyrstu kanningarnar vístu, at stovnurin av Norðhavssild var átta milliónir tons, og tað var væl meir, enn fyrr mett.

Aril Slotte vildi ikki gera viðmerkingar til tey tíðindini, men vísti á, at úrslitini av kanningunum verða almannakunngjørd um mánaðarskiftið.