Mugu fáa útlendska arbeiðsmegi

Meira enn túsund størv innan íslendsku ferðavinnuna mugu mannast við útlendskari arbeiðsmegi, sigur professari við lærda háskúlan í Akureyri

Vøksturin í ferðavinnuni í Íslandi verður so stórur, at neyðugt verður at fáa útlendingar í vinnuna at arbeiða, er metingin hjá professara á lærdum háskúla

Mynd: Savnsmynd/AP

Sigrún H. Brend

Bjarni Mohr

13.04.2015 - 15:58

- Tað er mær púra greitt, at um talið á útlendskum ferðafólki veksur, soleiðis sum útlit og ábendingar eru um, verður brúk fyri nógv fleiri arbeiðsfólkum í vinnuni.

Tað sigur Edward H. Huijbens, professari við lærda háskúlan á Akureyri, ið eisini stjóri fyri íslendsku ferðavinnu-granskingarmiðstøðina.

Sambært frágreiðing frá íslendska Landsbankanum, er talið av størvum innan ferðavinnuna vaksið úr 9.200 í 2008 upp í 14.600 størv í fjør.

Nógvir útlendingar arbeiða longu í ferðavinnuni

Talið av vitjandi í Íslandi fer væntandi at vaksa úr 1,17 milliónum í ár upp í 1,34 milliónir næsta ár og upp í 1,45 milliónir í 2017.

Innan næstu sjey árini er talið av vitjanum í Íslandi komið upp í tilsamans tvær milliónir, skrivar íslendska blaðið, Vísir.

Nógvir útlendingar arbeiða longu nú innan íslendska ferðavinnuídnaðin. Sambært frágreiðing frá Lærda háskúlanum í Ìslandi eru í løtuni tveir triðingar av arbeiðsmegini í ferðavinnufyritøkum í Íslandi útlendingar.