65 ára gomul átt ferburðar

Annegret Raunigk eigur frammanundan 13 børn og sjey ommubørn og fekk keisaraskurð á einum sjúkrahúsi í Berlin.

Hon er elsta kvinna nakrantíð, ið hevur fingið fýra børn í senn, men ikki elsta kvinna, ið hevur átt børn. Í Spania fekk ein 66 ára gomul kvinna tvíburðar í 2006, og í India verður sagt, at ein kvinna fekk tvíburðar 70 ára gomul.

Hóast børnini hjá týsku Annegret Raunigk ikki eru meira enn í 26. viku, nú tey komu í verðina, verður hildið, at tey hava góðar møguleikar at koma undan. 65 ára gamla kvinnan sigur, at hon vildi eftirlíka ynskið hjá yngstu, tíggju ára gomlu dóttur síni um at fáa ein lítlabeiggja ella lítlasystir og hevur verið í Ukraina og fingið viðgerð, so hon kundi gerast við barn.

At kvinnur, ið eru so gamlar fáa viðgerð og gerast við barn, hevur fingið nógva umrøðu í Týsklandi - fyri og ímóti. Annegret Raunigk sjálv sigur seg ikki leggja í, hvat fólk halda. Avgerðin er hennara egna og hon heldur seg vera væl fyri at passa børnini, hon nú hevur fingið.