ES ráðharrar á snarfund um flóttafólkatrupulleika

Fundurin verður 14. september, og er komin í lag eftir at innanríkisráðharrarnir í stóru evropeisku londunum Týsklandi, Fraklandi og Stóra Bretlandi sunnudagin vildu hava ES-fund, har loysnir skulu finnast fyri tí, sum teir nevna eina kreppustøðu.

- Vit eru øll samd um, at vit hava ikki meira tíð at spilla, sigur týski innanríkisráðharrin, Thomas de Maiziére.

- Hendan støðan krevur at vit í verki gera nakað beinavegin, og at vit vísa samhaldsfesti í Evropa, sigur týski innanríkisráðharrin.

SÍ EISINI Leiðarar á kreppufund um flóttafólkastreymin

Týskland, sum væntar at taka ímóti 800.000 flóttafólki í ár, hevur mælt til, at ein listi yvir sonevnd "góðkend upprunalond" verður gjørdur fyri at skunda undir viðgerðirnar av umsóknum um friðskjól.

Hetta er partur av áheitanini frá teimum trimum innanríkisráðharrunum. Grikkaland, sum hevur stórar fíggjarligar avbjóðingar, hevur tikið í móti fleiri túsund flóttafólkum, og er undir stórum trýsti verður sagt.

Eysturevropeisku londini kundu hjálpt meira

Samstundis, sum fundurin varð innkallaður, segði franski ráðharrin, Laurent Fabius, sína hugsan um eysturevropeisku londini í ES, sum hann heldur gera alt ov lítið fyri at hjálpa.

- Eg haldi, at tað er skammiligt, tá eg síggji ES-lond, serliga eystanfyri, sum ikki vilja taka ímóti flóttafólkum, segði Laurent Fabius við útvarpsrásina Europe One.

Fríggjadagin staðfesti ST, at higartil í ár eru 300.000 fólk farin um Miðjarðahavið við tí fyri eyga at sleppa inn í Evropa.