Dylja bústaðin hjá flóttafólkum

Umeå kommuna í Svøríki hevur gjørt av at dylja, hvar flóttafólk skulu búgva. Hetta stigið hevur kommunan tikið, tí fleiri tilburðir hava verið í seinastuni, har eldur er settur á tilhaldsstøð hjá flóttafólki.

Almenna svenska sjónvarpið skrivar á heimasíðu sínari, at kommunan í Umeå løtuni fyrireikar bústaðir til 150 flóttafólk, sum eftir ætlan skulu koma seinni í vikuni.

Eldur settur á gamlan skúla

Kommunan í Umeå hevur av trygdarávum gjørt av ikki at upplýsa nágreiniliga, hvar flóttafólkini skulu halda til. Eldur er settur á fleiri bygningar seinastu dagarnar.

Millum annað varð eldur settur á ein gamlan skúlabygning í Kungsbacka um vikuskiftið, har fólk, sum biðja um friðskjól, skuldu fáa innivist.

Umeå kommuna ætlar eisini at hava varðhald við bústaðirnar, tá teir lata upp, skrivar svenska sjónvarpið á heimasíðuni.