Trý prosent siga nei, sjeyndi hvør ivast

83 prosent taka undir við verkætlanini, sambært einari kanning, sum Gallup Føroyar gjørdi fyri FarGen. FarGen er verkætlan um at lesa arvastreingirnar hjá føroyingum, sum vilja tað.

14 prosent hava ikki tikið støðu til spurningin. Tey svaraðu hvørki ja ella nei, tá tey vórðu spurd, um FarGen skal fremjast.

Triði hvør vil lata blóð

Ein triðingur av teimum spurdu søgdu seg vilja lata blóð til FarGen, 43 prosent svaraðu, at tað fara tey kanska at gera.

Noomi O. Gregersen, verkætlanarleiðari fyri FarGen, sigur, at kanningin vísir greitt, at fólk taka undir við verkætlanini.

- Tað er tí, at vit við góðum treysti í næstum fara at bjóða fólki at vera við, sigur Noomi O. Gregersen, verkætlanarleiðari.

Málið at fáa allar føroyingar í dátugrunn

Í fyrstu atløgu skulu arvastreingirnir hjá 1.500 føroyingum lesast og skrásetast í einum dátugrunni. Hetta skal vera liðugt á heysti næsta ár. Men málið er at fáa allar føroyingar, sum vilja tað, við í verkætlanina.

Endamálið er at skapa møguleikar fyri gransking í føroyskum ílegum, genum, so betur ber til at fyribyrgja sjúkum og geva viðgerðir í heilsuverkinum.

526 fólk eldri enn 17 ár svaraðu spurningunum hjá Gallup Føroyum um FarGen.