Meiningakanning: Eigur at leggja frá sær

Stórur meiriluti av íslendingum halda, at Sigmundur Davíð Gunnlaugsson, eigur at leggja embætið sum forsætisráðharri frá sær. Tað vísir nýggj meiningarkanning, sum Gallup hevur gjørt.

Kanningin varð gjørd í gjár og fyrradagin, og spurt varð, um forsætisráðharrin eigur at leggja frá sær ella halda fram í embætinum.

Niðurstøðan er, at 81 prosent av teimum spurdu svara, at Sigmundur Davíð Gunnlaugsson skal leggja frá sær, og 19 prosent svara, at hann skal ikki leggja frá sær.

Fleiri kvinnur enn menn halda, at hann skal leggja frá sær, og fleiri høvuðsstaðarborgarar enn fólk á bygd. 699 vórðu spurd, og 91 prosent av teimum svaraðu.