Gevst eftir ósemju við forsetan

Forsætisráðharrin í Turkalandi, Ahmet Davutoglu, leggur frá sær, skrivar tíðindastovan Ritzau. Tað boðaði hann sjálvur frá á floksfundi hjá AKP-flokkinum í dag.

Ahmet Davutoglu gevst eisini sum leiðari í stjórnarflokkinum AKP, boðaði hann samstundis frá á fundinum. Nýggjur forsætisráðharri verður valdur 22. mai, tá flokkurin heldur eyka floksting.

Ósamdur við forsetan

Orsøkin, til at forsætisráðharrin leggur frá sær, er ein ósemja millum hann og forsetan, Recep Tayyip Erdogan, sum stovnaði AKP-flokkin.

Recep Tayyip Erdogan, forsetin í Turkalandi, ynskir at broyta parlamentarisku skipanina í landinum.

Tað fall tó ikki í góða jørð hjá fráfarandi forsætisráðharranum í Turkalandi, ið heldur valdi at leggja frá sær orsakað av fráboðaðu broytingini.