Fleiri biðja um friðskjól í Íslandi

Til 1. mai bóðu 177 útlendingar um friðskjól, tríggjar ferðir so nógv sum somu tíð í fjør, upplýsir íslendska útlendingastovan.

Bara í apríl bóðu 42 fólk úr 17 londum um friðskjól í Íslandi. Tey flestu, sum vilja sleppa at búgva í Íslandi, eru úr Albania og Makedonia.

79 prosent eru menn, og 79 prosent av teimum, sum vilja fáa friðskjól, eru vaksin fólk. Útlendingamyndugleikarnir avgreiddu 186 umsóknir fyrstu fýra mánaðir ársins.

Vesturlendingar søkja eisini um friðskjól

37 sluppu at vera í Íslandi, hálvthundrað fingu noktandi svar, og 66 vórðu send av landinum aftur. Tey flestu, sum fingu friðskjól, eru úr Irak og síðani úr Sýria og Iran.

Tað kemur fyri, at fólk úr Vesturheiminum søkja um friðskjól í Íslandi. Í ár hava tvey fólk úr Kanada og ein breti søkt um friðskjól, men svarið, tey fingu, var nei.

Í apríl søktu tríggir amerikanarar um friðskjól, men teirra umsóknir eru ikki avgreiddar enn.