Pundið fellur framvegis

Tað verður ikki mett bert at vera av tí ringa, at pundið lækkar. Tað kann vera við til at gera búskaparligu støðuna betri, tí bíligari verður at keypa vørur úr Bretlandi.

Størsti trupulleikin í Bretlandi er kortini, at fyritøkur, sum høvdu ætlanir um at gera íløgur, ikki hava gjørt íløgurnar, tí tær hava bíðað eftir úrslitinum av fólkaatkvøðuni.

SÍ EISINI Londini ósamd um gongdina

Støðan verður ikki betri av, at teir tríggir, sum vóru fremst í stríðnum, fyri ella ímóti bretska limaskapinum í ES, allir hava boðað frá, at teir leggja frá sær.

Talan er um David Cameron, forsætisráðharra, Boris Johnson, sum skuldi vera eftirmaður hansara, og formannin í ES mótstøðuflokkinum, UKIP, Nigel Farage.

Skatturin lækkar kanska

Bretski fíggjarmálaráðharrin, George Osborne, hevur mælt til, at skatturin verður lækkaður, og at partafelagsskatturin skal úr 20 niður í 15 prosent.

Stjórin í bretska tjóðbankanum, Mark Carney, hevur mælt til, at Bretland broytir pengapolitikkin. Tað kann hava við sær, at Bretland fer at toga restina av Evropa við sær.

Hetta fer tó bert at henda um skilnaðurin verður gjørdur í sátt og semju, siga serfrøðingar. Samstundis arbeiðir europeiski miðbankin við eini ætlan um at stuðla londunum í Evropa, nú Bretland fer úr samveldinum.