Suðurkorea: Norðurkorea hevur avrættað ráðharra

Norðurkorea hevur avrættað Kim Yong-jin, vararáðharra í undirvísingarmálum, siga embætisfólk í Suðurkorea sambært BBC News.

Uppáhaldið hjá suðurkoreansku embætisfólkunum er ikki váttað. Tað er heldur ikki greitt, hvaðani tíðindini eru, um at ráðharin skal vera avrættaður.

Hetta er ikki fyrstu ferð, at Norðurkorea skal hava tikið høg embætisfólk í landinum av døgum. Í februar ljóðaði, at ein herovasti í landinum var avrættaður.

Tá ljóðaði, at herovastin Ri Yong-gil varð avrættaður, tí hann hevði mutrað fólk og hevði elvt til sundurlyndi í kommunistiska stjórnarflokkinum.