Eingir læknar at gera kanningar

Landsstýriskvinnan í heilsumálum harmast um, at tað dregur út at fáa sett kanningar fyri bróstkrabba í verk. Læknatrotið er orsøkin, sigur hon

Læknatrotið í Føroyum er atvoldin til, at tað hevur ikki eydnast enn at bjóða kvinnum regluligar kanningar fyri bróstkrabba, sigur landsstýriskvinnan í heilsumálum

Bjarni Mohr

14.09.2016 - 11:49

Tað gongur striltið hjá Landssjúkrahúsinum at fáa politisku avgerðina um at bjóða kvinnum yvirlitskanningar fyri bróstkrabba setta í verk. Landsstýriskvinnan harmast.

- Læknatrotið er orsøkin til, at mammografiscreeningar ikki eru settar í verk enn, segði Sirið Stenberg, landsstýriskvinna í heilsumálum, við útvarpið týskvøldið.

Kanningarnar fyri bróstkrabba verða helst ikki settar í verk fyrr enn í mars næsta ár, sigur Johnny í Grótinum, stjóri á Landssjúkrahúsinum, við útvarpið.

Kann ikki lova nakað

Landsstýriskvinnan í heilsumálum er ikki sannførd um, at tað fer at bera til at kanna kvinnur fyri bróstkrabba um eitt hálvt ár, sum stjórin á Landssjúkrahúsinum vónar.

- Eg fari at fylgja við, hvussu gongur at gera avtaluna, sigur Sirið Stenberg, landsstýriskvinna, sum ikki kann veita vissu fyri útspælinum hjá Johnny í Grótinum.

Tað var táverandi landsstýrismaðurin, Karsten Hansen, ið fór undir ætlanina at kanna allar kvinnur millum 50 og 69 ár fyri bróstkrabba. Endamálið var, at 25 prosent færri skuldu doyggja.