Mugu boðsenda útlendingum

Tað gongur so illa hjá Royal Greenland at fáa grønlendingar at arbeiða á fiskavirkjum, at neyðugt verður at boðsenda kinesarum at manna virkini

Tað gongur so illa at fáa grønlendingar at arbeiða á fiskavirkjum í landinum, at boð nú eru send eftir útlendingum at arbeiða á virkjunum

Johnsigurd Johannesen

Bjarni Mohr

24.10.2016 - 09:01

Fyrstu 30 kinesararnir koma til Grønlands í vár, sigur samtøkustjórin í Royal Greenland, Søren Olsen Damgaard, við heimasíðuna hjá Royal Greenland.

- Søludeildin í Kina er farin at søkja eftir 30 fólkum, sum vilja arbeiða á fiskavirkjunum. Hetta er bara fyrsta stigið.

Ætlanin er at fáa fleiri útlendingar at arbeiða hjá okkum næsta ár, sigur Søren Olsen Damgaard. Formaðurin í grønlendska landsfelagsskapinum, SIK harmast um støðuna.

SÍ EISINI Grønlendingar tíma ikki at arbeiða fisk

Jess G. Berthelsen sigur við grønlendska kringvarpið, KNR, at tað ber ikki til at skera allar grønlendingar yvir ein kamb og siga, at teir tíma ikki at arbeiða.

Formaðurin í SIK viðurkennir, at tað eru trupulleikar í ávísum vinnum, millum annað í fiskiídnaðinum.

- SIK er ikki ført fyri at loysa trupulleikan einsamalt. Vit noyðast øll at samstarva, til tess at loysa trupulleikan, sigur Jess G. Berthelsen.