Sinnaðir at fáa viðurskifti í rættlag

Vladimir Putin hevur boðað frá, at Donald Trump hevur sagt seg vera sinnaðan at fáa betri samband við Russland. Vladimir Putin vil eisini samstarva

Nú skulu viðurskiftini millum USA og Russland fáast í rættlag. Forsetarnir í USA og Russlandi siga seg báðar vera sinnaðar at arbeiða fyri at bøta um viðurskiftini

Uni Holm Johannesen

Bjarni Mohr

21.11.2016 - 09:18

- Eg havi sagt honum tað sama, segði Vladimir Putin, forseti í Russlandi, á toppfundinum hjá APEC um vikuskiftið.

Síðan Russland fyri tveimum árum síðan legði Krimhálvoynna undir seg, hava viðurskiftini millum Russland og USA verið spent.

Bæði ES og USA hava fordømt Russland. Støðan versnaði, tá Russland fløkti seg uppí kríggið í Sýria og ikki virdi avtalur um vápnahvíld.

Grundleggjandi rættindi tryggjast

Barack Obama hevur sagt seg vóna, at Donald Trump fer at seta Russlandi hart ímóti hørðum, um Putin ikki virðir grundleggjandi rættindi og landamørk hjá sjálvstøðugum londum.

- Fólkaræði, talufrælsi og altjóða siðvenjur skulu virðast, segði Barack Obama í røðu í Berlin í síðstu viku.

Men skjótt skulu Vladimir Putin og Donald Trump tosa saman, so viðurskiftini millum londini kunnu fáast í rættlag. Hvat tað vil siga meira ítøkiliga, vildi Putin ikki siga um vikuskiftið.