Verkfall hjá fiskimonnum kanska av

Útlit eru fyri, at okkurt avgerandi fer at henda í dag í verkfallinum hjá íslendskum fiskimonnum, sum nú hevur verið í næstan tveir mánaðir. Tað byrjaði 14. desember í fjør.

Sambært Morgunblaðnum hava samráðingarnevndirnar hjá fiskimonnum fundir í dag, har viðgjørdir verða aðrir møguleikar fyri semju enn teir, sum higartil hava verið á borðinum.

Hundraðtals milliónir mistar

Íslendska stjórnin hevur ikki lagt seg út í verkfallið við lógaruppskoti um at steðga tí. Men hon hevur saman við kommununum gjørt frágreiðing um avleiðingarnar av verkfallinum.

Ísland hevur millum annað mist útflutingsinntøkur fyri 220 til 310 milliónir krónur. Fiskimenn hava mist 220 milliónir í hýrum.

2.400 til 2.600 fólk, sum arbeiða á fiskavirkjum, hava mist góðar 50 milliónir krónur í løn. Tey hava higartil fingið slakar 20 milliónir krónur frá arbeiðsloysisskipanini.