Vilja hava vegin til Selatraðar tryggan

Landsvegurin av Strondum til Selatraðar er ikki ein hóskandi farleið.

Landsvegarstrekkið er ótíðarhóskandi og í støðum vandamikið, serliga vetrarhálvuna.

Tí heita fólk í Kolbeinagjógv, á Morkranesi og á Selatrað nú inniliga á landsstýrismannin í samferðslumálum, Henrik Old, um at taka ítøkilig stig at fáa landsvegin til eina trygga farleið.

Landsstýrismaðurin tók væl ímóti undirskriftunum, men gav eingi beinleiðis lyftir annað enn, at hann sum skjótast fer at hyggja at viðurskiftunum og fáa gongd á málið.

Allur vegurin krevur dagføring

Brúk er fyri at dagføra allan Selatraðarvegin.

Hóast vegurin varð breiðkaður fyri nógvum árum síðani, hevur tað higartil ikki verið til stóra nyttu, tí asfalt er ikki lagt á. 

Talan er um tveir teinar, 600 metrar, á Selatraðarvegnum, beint sunnan fyri Morkranes og millum Morkranes og Selatrað. 

Í løtuni eru eingir pengar til asfalt á Selatraðarvegin, sigur Henrik Old, landsstýrismaður.

Svaraði tingmanni

Hann  svaraði um ársskiftið spurningi frá Helga Abrahamsyni, løgtingsmanni, sum heldur tað vera stórt spell at brúka pengar til at umvæla ein veg, tá eingin nytta fæst burtur úr umvælingini, tí vegurin verður ikki asfalteraður. 

Henrik Old er samdur. Hann sigur, at brúk er fyri at dagføra allan Selatraðarvegin. 

Landsverk hevur áður til fánýtis mælt til at játta millum tvær og fimm mió. kr. um árið til at breiðka og dagføra vegin. 

Landsvegakervið er 472 kilometrar langt. Landsverk brúkar millum sjey og níggju milliónir um árið til asfaltering.

Tær røkka til at asfaltera sjey til níggju kilometrar.

Játtanin til at viðlíkahalda og reka landsvegirnar minkar støðugt.