Fjórði samskiftisstjóri hjá Trump úr starvi

29 ára gamla Hope Hicks varð sett í starv í september í fjør.

Hope Hicks varð í gjár avhoyrd í sambandi við at ein nevnd í Kongressini kannar, um Russland møguliga hevur blandað seg í forsetavalið í 2016.

Hicks noktaði at svara flestu spurningunum frá nevndini, men viðgekk tó, at hon stundum noyddist at siga onkra hvíta lygn. Hon vissaði tó um, at hon ongantíð hevur logið, tá tað hevur við Russland og valið í 2016 at gera, skrivar New York Times.

Sarah Sanders, fjølmiðlastjóri í Hvítu Húsunum, sigur, at einki samband er millum uppsøgnina og vitnisfrágreiðingina, skrivar Reuters tíðindastovan.

Hope Hicks var fjórði persónurin í hesum starvinum sum samskiftisstjóri innanfyri minni enn eitt ár. Hon kom úr starvinum sum leiðari fyri strategiska samskiftinum í Hvítu Húsunum. Eitt nytt starv, sum var sett, tá Donald Trump tók við sum forseti.

Samanborið við tey, sum sótu í starvinum undan henni, so helt hon lágan profil og tosaði sjáldan við fjølmiðlar ella tosaði alment.

Hicks hevur arbeitt sum modell og PR-fólk. Hon hevur eisini verið ráðgevi hjá Ivanku Trump, sum er dóttir Donald Trump, skrivar YLE.