Russland svarar aftur

Russland vísur nú 23 bretskum diplomatum av landinum. 

Tað upplýsir russiska uttanríkisráðið. Diplomatarnir skulu verða úr landinum um eina viku, tað skrivar dr.dk. 

Fráboðanin kemur í kjalarvørrunum av, at Bretland fyrr í vikuni vístu 23 russiskum diplomatum av landinum, aftaná eitt eiturálop á fyrrverandi russiska njósnaran, Sergej Skripal, og dóttrina, Juliu, í bretska býnum Salisbury 4. mars.

Russland vil eisini hava Stóra Bretland at lata sendistovuna hjá sær í Sankta Pætursborg aftur.

Russland hevur higartil nokta fyri at hava nakað við álopið at gera, men Bretland hevur sett í verk revsitiltøk ímóti Russlandi. USA, Stóra Bretland, Frakland og Týskland sendu hósdagin út eina yvirlýsing, har tey vísa á, at tað er Russland, sum hevur skipað fyri eiturálopinum.