Ætla sær meira í løn í staðin fyri eftirlønina

Eftirlønin hjá limunum í Akademikarafelagnum er framvegis 16 prosent.

Tað er hon, hóast felagið í hoyringarskrivi í desember í fjør saman við Búskapar- og løgfrøðingafelagnum og Yrkisfelagnum miðnámi sigur seg ætla at fáa eftirlønina lækkaða niður í 12 prosent, um lógaruppskotið um at hækka inngjaldið til Samhaldsfasta verður samtykt.

Uppskotið um at hækka inngjaldið er samtykt eina ferð í tinginum, men ein viðgerð er eftir.

Akademikarafelagið gjørdi sáttmála við Fíggjarmálaráðið fyri einum mánaða síðani. Og eftirlønin er framvegis 16 prosent.

BLF ikki samráðingar enn

Búskapar- og løgfrøðingafelagið er ikki farið til samráðingar enn.

Men felagið hevur í huga at krevja eftirlønina setta niður úr 15 í 12 prosent og fáa munin oman á vanligu lønina í staðin fyri.

Fíggjarmálaráðið hevur lækkað kravda markið fyri eftirløn niður í 12 prosent, so fólk tann vegin fáa pengar til at gjalda til Samhaldsfasta.

Nevndin í BLF fer at skipa seg seinnapartin í morgin eftir aðalfundin, sum var herfyri.

Felagið skal hava nýggjan formann ella forkvinnu, tí Jóhan Pauli Helgason hevur boðað frá, at hann heldur ikki fram sum formaður felagsins.