USA krevur upptøkur um Khashoggi útvegaðar

USA hevur nú biðið Turkaland um at útvega upptøkuna, sum eftir øllum at døma vísir, at saudiarabiski journalisturin, Jamal Khashoggi, varð tikin av døgum í saudiarabisku sendistovuni í Istanbul.

Khashoggi, ið skrivaði atfinningarsamar greinar móti stýrinum í Saudi Arabia, varð seinast sæddur 2. oktober, tá hann fór inn á sendistovuna. Eisini verða 15 saudiskir agentar sæddir fara inn á sendistovuna aftaná tíðindamannin, og sambært New York Times hava í øllum fýra av teimum samband við kongshúsið í Saudiarabia.

Kongshúsið hevur sagt seg einki hava við drápið at gera.

Upptøkan, sum turkiskir myndugleikar siga seg sita inni við, skal prógva, at journalisturin varð tikin av døgum, og á upptøkini er málið á saudiarabiska sendimanninum í Turkalandi, Mohammed al-Otaibi, eisini at hoyra.

Donald Trump sigur seg ikki halda, at turkar lúgva um upptøkuna, men hann vil síggja prógvini fyrst.

Hendingin á sendistovuni í Turkalandi hevur lagt sambandið millum Saudiarabia og fleiri lond í vesturheiminum undir trýst. 

Serliga USA og Saudiarabia hava sterk handilssambond.