Granskarar: Arafat varð eitraður

Granskarar í Sveis hava nú almannakunngjørt, at innihaldið av polonium í einstøkum likamslutum á fyrrverandi palestinska forsetanum, Yasser Arafat, var 18 ferðir hægri enn vanligt. Yasser Arafat doyði á einum fronskum sjúkrahúsi í 2004, eftir at hava verið sjúkur leingi. Deyðsorøskin var ongantíð staðfest, og palestinska leiðslan hevur tvíhildið um, at hann var eitraður.

Tá tað í fjør varð staðfest, at nógv av geislavirkna evninum, polonium, var í klæðunum, vóru klæðini send til kanningar í Sveis. Úrslitið er nú almannakunngjørt, og granskararnir siga, at tað er mest sannlíkt, at Yasser Arafat var eitraður.

Ísrael vísir aftur

- Hevði eg verið dómari, so hevði eg sagt, at Arafat var eitraður í november í 2004, sigur ein av granskarunum, David Barcley, við sjónvarpsrásina Al Jazeera. Palestinsku myndugleikarnir hava fleiri ferðir skuldsett Ísrael fyri at hava eitrað Yasser Arafat, men Ísrael hevur víst skuldsetingunum aftur.

Eygleiðarar siga seg stúra fyri, at ófriður fer at bresta á í palestinsku økjunum, nú frágreiðingin hjá granskarunum í Sveis er almannakunngjørd.