Barroso væntar semju um makrelin

Okkurt bendir á, at ein makrel-semja er á gáttini millum strandalondini. Í øllum førum er nógv røring í beint nú.

Eitt nú væntar ES-nevndarformaðurin, Jose Manuel Barroso, semju um makrelin áðrenn nýggjár, skrivar vágaportalurin, sum hevur tíðindini frá heimasíðuni hjá Wall Street Journal.

Loysn í ljósmála

Jose Manuel Barroso hevur verið á vitjan í Noregi og segði á tíðindafundi, at ein loysn eigur at verða funnin á makrel-trætuni í ár.

- Hetta fram til nýggjárs er ein lagalig løta, og partarnir eiga at brúka hana at seta seg saman at finna eina loysn, segði Jose Manuel Barroso, ES-nevndarformaður.

Á tíðindafundinum kom eisini fram, at umboð fyri ES-formansskapin vænta, at nýggir fundir vera millum ES, Noreg, Føroyar og Ísland áðrenn nýggjár. Og so kemur Maria Damanaki, ES-fiskivinnukommiserur, væntandi til Føroya á almenna vitjan 11. og 12. august.