Andorra - Føroyar beinleiðis í útvarpinum

Í kvøld spæla Andorra og Føroyar um at gerast nummar eitt í Bólki A. Bæði liðini hava tryggjað sær víðari luttøku í hálvfinalurnar. Dysturin verður beinleiðis útvarpaður.

Dysturin í kvøld avgerð, um Føroyar skulu spæla ímóti Georgia ella Moldova í hálvfinaluni í morgin. Georgia verður mett at vera sterkasta liðið í bólki B.

Úrslit hjá Føroyum:

Føroyar - Aserbadjan 43 - 12

Føroyar - Írland 40 - 13

Úrslit hjá Andorra:

Andorra - Írland 42 - 20

Andorra - Aserbadjan 32 - 23

Sjúka í føroyska hópinum

Tveir leikarar eru ivasamir til dystin í kvøld. Jónas G. Djurhuus og Kjartan Johansen hava ligið við búkilsku, og enn er ikki greitt, um teir verða klárir til dystin í kvøld.

Føroyski hópurin hevur tó fingið tríggjar leikarar afturat, sum ikki vóru við í teimum báðum fyrstu dystunum. Hesir hava verið til próvtøkur í Føroyum og í Danmark.

Men í nátt komu Julian Olsen (VÍF), Tóraldur Kollsker (H71) og Eirikur Simonsen (Viborg) til La Vella í Andorra, og teir eru við í kvøld.