Eingin vápnahvíld í Gaza

<p>- Øll krevja, at vit góðtaka vápnahvíld og síðani samráðast um okkara rættindi. Hesum vísa vit aftur, og tað gera vit eisini í dag, sigur leiðarin fyri Hamas-felagsskapinum, Khaled Meshaal.</p>

<p>Leiðarin fyri Hamas-felagsskapin, Khaled Meshaal, sigur, at Hamas er fyri vápnahvíld, um Ísrael strikar stongsilin av Gaza, sum hevur vart í nógv ár.</p>

<p>Stríðshugaðir palestinar skutu ígjár 98 rakettir inn yvir Ísrael. 25 av rakettunum vórðu oyðilagdar í ísraelsku verjuskipanini, skrivar tíðindastovan Ritzau.</p>

<p><strong>Stríðið kravt 700 mannalív higartil</strong></p>

<p>Stríðið millum Ísrael og Palestina, sum nú hevur vart í 16 dagar, hevur kravt meira enn 700 mannalív. Í nátt lótu 21 palestinar lív í flog-og skotálopum.</p>

<p>Sambært mannarætætindafelagsskapum eru meira enn 80 prosent av teimum dripnu sivilir palestinar. Palestinska mannarættindamiðstøðin sigur, at 160 av teimum eru børn og í minsta lagi 90 eru kvinnur, skrivar Ritzau.</p>

<p>Higartil hava 32 ísraelar latið lív,&nbsp;av teimum eru 29 hermenn. Í gjár lótu tríggir ísraelskir hermenn lív.&nbsp;Harumfram hava tríggir sivilir ísraelar latið lív í rakettálopum úr Gazageiranum.</p>