Ísland gevur sær sjálvum 20.000 tons afturat

Íslendski fiskimálaráðharrin hevur hækkað íslendsku makrelkvotuna 13,6 prosent. Hann hevur lagt 20.100 tons oman á kvotuna, so hon nú er 167.800 tons.

Ísland er framvegis ikki við í fimm ára semjuni millum hini strandarlondini um makrelin. 

Sambært teirri semjuni eiga Ísland, Grønland og Russland góð 190-túsund tons av heildarkvotuni. Men Grønland hevur tikið 100-túsund tons í sín part, og nú hevur Ísland hækkað sína kvotu upp í knappliga 170-túsund tons.

Íslendska fiskimálaráðið hevur ikki rópt út um allar geilar, at makrelkvotan er hækkað.

Sambært heimasíðuni hjá fiskivinnublaðnum Fiskifréttir varð hækkingin kunngjørd í íslendska kunngerðablaðnum 2.juli.

Men eingi tíðindi um hækkaðu kvotuna eru á heimasíðuni hjá Fiskimálaráðnum. Og ikki fyrr enn fyrst í hesari vikuni kunngjørdi Fiskistovan, sum umsitur fiskiloyvini, á sínari heimasíðu, at skip og bátar sleppa at fiska meira makrel í ár.

Og norðmenn hava funnið stóran og góðan makrel langt norðuri í Barentshavinum, heilt norðuri við Bjarnoynna.

Makrelur er eisini funnin longri vesturi enn fyrr.