- Tíðindi, mentan og ítróttur
Burkina Faso brennir
![](https://kvf.fo/sites/default/files/styles/grein-ovasta-mynd/public/burkina_faso_brennir.jpg?itok=1HdElcOP)
Parlamentið í høvuðsstaðnum í Burkina faso, hann eitur Ouagadougou, stendur í ljósum loga. Tað skrivar BBC, sum hevur fólk á staðnum, fyri løtu síðani.
Sum skilst hava mótmælisfólk fest eld í, tí parlamentið umhugsar at broyta grundlógina í Burkina Faso, so forsætisráðharrin Blaise Compaoré kann halda fram.
Blaise Compaore hevur sitið við valdið síðani hernaðarkvettið í 1987. Fleiri val hava verið, sum forsætisráðharrin hevur vunnið greitt, men bæði andstøðan í landinum og altjóða samfelagið hava sett spurnatekin við øll valini, - sum øll hava verið merkt av illgruna um svik.
Sambært altjóða tíðindastovuni AFP, hava umleið 1500 mótmælisfólk hertikið parlamentið. Almennu loftmiðlarnir í landinum eru sløktir og løgreglan hevur skotið við táragassi eftir mótmælisfólkunum.