Palestinar skjótt limir í revsidómstóli

Mahmoud Abbas, forseti fyri palestinsku sjálvstýrismyndugleikarnar, fær eftir øllum at døma krav sítt, um at sjálvstýrið skal gerast partur av Altjóða revsidómstólinum, ICC, eftirlíkað.

Ban Ki-Moon, ST-aðalskrivari, hevur upplýst, at palestinarar kunnu gerast partur av dómstólinum 1. apríl. Hesin dómstólurin viðger mál um krígsbrotsverk og brotsverk móti mannaættini.

Palestinsku sjálvstýrismyndugleikarnir vóna, at slóð nú verður ruddað fyri, at teir kunnu stevna ísraelsmonnum, sum hava dripið palestinarar í økjunum, sum Ísrael hevur hersett.

Palestinar hjálpa ikki friðartilgongdini

Ísrael hevur svarað aftur við ikki at lata sjálvstýrismyndugleikum skattin, sum Ísrael krevur inn fyri teir. Ísraelski forsætisráðharrin, Benjamin Netanyahu, hevur sagt, at tann, sum hevur mest at óttast, er palestinska sjálvstýrið.

Amerikanska uttanríkisráðið sigur, at palestinska stigið hjálpir ikki friðartilgongdini í Miðeystri. Ísrael hevur hersett Vestara áarbakka síðani 1967.

Tá tók Ísrael eisini millum annað Eysturjerusalem og Gaza geiran, men í 2005 tók Ísrael seg úr Gaza geiranum, har Hamas nú hevur valdið.