Heimsins leiðarar eru í Saudiarabia í dag

Heimsins fremstu leiðarar hava í dag verið í Saudiarabia, har minningarhald hevur verið fyri Abdullah kongi, sum doyði í gjár og varð grivin aftaná fríggjadagsbønina.

Úr USA var Joe Biden, varaforseti, komin, og úr Evropa vóru franski forsetin Francois Hollande, bretski trúnarvingin, Charles prinsur, og saman við honum David Cameron, forsætisráðharri. Russiski forsætisráðharrin, Dmitrij Medvedev, var eisini á minningarhaldinum í høvuðsstaðnum Riyadh.

Barak Obama, er á vitjan í India, men styttir vitjanina har og á veg aftur til USA týsdagin fer amerikanski forsetin til Saudiarabia at hitta 79 ára gamla Salman kong, ið hevur tikið við eftir hálvbróðurin Abdullah, sum doyði 90 ára gamal.

Umboð Danmarkar til minningarhaldið vóru Fríðrikur krúnprinsur og Nicolai Wammen, verjumálaráðharri.

Mannarættindafelagsskapir halda lítið um Abdullah kong

Heimsins leiðarar flokkast í Saudiarabia, tí landið er tað størsta og ríkasta í Miðeystri við stórum oljuríkidømi.

Um Abdullah kong verður sagt, at hann var framburðssinnaður - men kvinnurnar í Saudi Arabia sleppa t.d. framvegis ikki at koyra bil. Nevnt verður, at kongurin gav kvinnum sæti í ráðgevandi stjórnarráði sínum, og talið av kvinnum, ið fær hægri útbúgving, er nógv vaksið í stjórnartíð hansara.

Mannarættindafelagsskapir hava tó lítið gott at bera Abdullah kongi.

Neil Durkin, talsmaður fyri Amnesty, sigur, at í mannarættindahøpi var Abdullah kongur ein vanlukka. Talsmaðurin vísir m.a. á, at píning framvegis er púra vanlig í politivarðhaldum og í fongslum í Saudi Arabia.