Koppingarevni fyri ebola verður nú roynt

Fyrsta koppingarevnið ímóti ebola er á veg úr Onglandi til Liberia, har ætlanin er at royna tað.

Men nú fækka tilburðirnir av ebola í Vesturafrika, og tí kann verða ilt at staðfesta, um koppsetingin verjir ímóti virussjúkuni.

Tað er bretska heilivágsfyritøkan GlaxoSmithKline, ið framleiðir koppingarevnið, og granskarar ætla, at 30.000 sjálvboðin skulu koppsetast.

10.000 fólk fáa koppingarevni fyri ebola, 10.000 onnur fáa eitt óvirkið evni, so samanberingar kunnu gerast, og haraftrat fáa 10.000 fólk eitt annað royndarkoppingarevni.

Minni roynd er gjørd frammanundan

Frammanundan hava 200 sjálvboðin í Bretlandi, USA, Sveis og Mali roynt koppingarevnið, og higartil tykist alt at ganga, sum tað skal, sigur bretska heilivágsfyritøkan.

Hon undirstrikar, at koppingarevnið enn er á royndarstigi, og heimsheilsustovnurin WHO og aðrir myndugleikar skulu góðkenna evnið, áðrenn tað kann brúkast at koppseta alt fólkið í ávísum londum við.

Ein onnur heilivágsfyritøka, Merck, er eisini á veg við einum koppingarevni, sum skal roynast í Guinea, Liberia og Sierra Leone komandi mánaðirnar.

Og ein heilivágur fyri Ebola sigst fara at verða royndur um nakrar vikur.