Fýra milliónir minni til heilsutrygdarveitingar

<p>Heilsumálaráðið ætlar, at peningurin, ið skal sparast á Landssjúkrahúsinum, millum annað skal finnast við lægri útgjaldi til heilsutrygdarveitingar.</p>

<p>Sum liður í ætlanini hjá Jørgeni Niclasen, fíggjarmálaráðharra, um at einki hall skal verða á fíggjarlógini í 2016, var upprunaliga ætlanin at spara 32 milliónir krónur í heilsuverkinum í 2015 og 2016 - umleið 16 milliónir hvørt árið.</p>

<p>Politiska viðgerðin av fíggjarlógini fyri 2015, er tó endað við at samlaðu sparingarnar eru niðri á umleið&nbsp;6 milliónum krónum, ístaðin fyri 16 milliónur krónur í 2015.</p>

<p><strong>Landssjúkrahúsið fekk 8,4 milliónir eyka</strong></p>

<p>Ætlaðu sparingarnar, sum kortini ikki bliva til nakað, eru millum annað tær 10 milliónurnar, sum heilsuverkið metti at spara í samband við, at 15 búfólk skuldu flyta út av psykiariska deplinum í 2015.</p>

<p>Av hesum 10 milliónunum, hevur landsstýrismaðurin í heilsumálum valt at goyma 3,5 milliónir krónur til aðrar raðfestingar innan heilsuverkið.</p>

<p>Tær 10 milliónirnar í sparingum blivu sostatt til 6,5 milliónir krónur.&nbsp;Somuleiðis verða sparingar fyri 5 milliónir krónur undir heitinum "Økt sparikrav", sum ikki er nærri lýst, strikaður.</p>

<p>Harumframt fekk Landssjúkrahúsið játtað 8,4 milliónir krónur eyka til raksturin tá fíggjarlógin varð samtykt. Tær sparingar, sum framhaldandi skulu fremjast, eru millum annað tvær milliónir krónur á kontuni til heilsutrygdarveitingar.</p>

<p><strong>Soleiðis verður spart</strong></p>

<p>Tilsamans fýra milliónir krónur eru skarvaðar av upphæddini til heilsutrygdarveitingar í 2015:</p>

<p>Tvær milliónir hevur landsstýrismaðurin í heilsumálum sjálvur biðið um at fingið fluttar til landssjúkrahúsið, og tvær av teimum hevur køgtingsins fíggjarnevnd av sínum eintingum skarvað av.</p>

<p>Heilsutrygdarveitingar, eru millum annað veitingarnar frá Heilsutrygd, í samband við, at tú skalt til lækna, og eru lógarbundnar. Tað vil siga, at vísir tað seg, at ov lítið er sett av til heilsutrygdarveitingar, má landsstýrismaðurin í tingið at biða um eykajáttan.</p>

<p>Aðrar sparingar, sum skulu fremjast, skulu finnast í Ílegusavninum, sum í størri mun skal verða eginfíggjað. Ílegusavnið skal vinna 250.000 krónur um árið, sum granskingarverkætlanir skulu gjalda fyri tilfar og tænastur.</p>

<p><strong>Sparingar raka eisini Klaksvíkar sjúkrahús</strong></p>

<p>Harumframt verða 400.000 krónur spardar á Klaksvíkar Sjúkrahúsið í samband við at bert ein seingjardeild verður í framtíðini.</p>

<p>Ætlaðu sparingarnar fyri 2016 eru ikki viðgjørdar politiskt enn, og tað ber tískil ikki til at siga við vissu, um tær verða framdar í verki.</p>

<p>Í spariætlanunum fyri 2016 eru tó enn 14,4 milliónir av 16 sambært heilsumálaráðnum sjálvum ikki útgreinaðar í nøkrum ítøkiligum spari-tiltøkum, men eru at finna undir yvirskipaðu yvirskriftunum "Umlegging í heilsuverkinum" og "Økt sparikrav".</p>