Flogskiparin var ikki í stýrihúsinum

Hurðin í stýrihúsinum var læst, og flogskiparin slapp ikki inn í stýrihúsið aftur tá flogfarið datt niður, skrivar The New York Times

Flogskiparin á niðurdotna flogfarinum hjá Germanwings, ið datt niður har suðuri í Alpunum í Fraklandi týsdagin, var ikki í stýrihúsinum, tá flogfarið datt niður. Her er eitt Airbus A320 flogfar hjá felagnum á flogvøllinum í Cologne í Týsklandi

Mynd: AP

Jákup Bogi Joensen

Bjarni Mohr

26.03.2015 - 07:58

Flogskiparin í flogfarinum hjá Germanwings, sum týsdagin datt niður har suðuri í Frakland við 150 fólkum umborð, var farin úr stýrihúsinum, tá vanlukkan hendi.

Tá flogskiparin skuldi fara aftur í stýrihúsið, var hurðin læst og hann slapp ikki inn. Flogskiparin bankaði fleiri ferðir á dyrnar, men einki svar kom frá stýrimanninum inni í stýrihúsinum.

Flogskiparin royndi eisini at sparka dyrnar upp, men tað eydnaðist ikki. Tað sigur ein kelda sum kannar vanlukkuna við amerikanska blaðið, The New York Times.

Greinin heldur fram niðanfyri

New div after blockquote

Germanwings pilot was locked out of cockpit before crash in France http://t.co/ZaIz1o0vbs pic.twitter.com/0l9Ony69Nr
— The New York Times (@nytimes) March 26, 2015

Upplýsingarnar stava frá tí eina svarta kassanum, sum varð funnin stutt eftir vanlukkuna.

- Vit vita framvegis ikki, hví flogskiparin fór úr stýrihúsinum. Vit vita bara, at hin flogskiparin var einsamallur í stýrihúsinum, og hann, sum fór úr stýrihúsinum, royndi at bróta inn aftur stutt áðrenn flogfarið datt niður, sigur keldan við blaðið.

Enn er ógreitt, hví flogskiparin í stýrihúsinum ikki svaraði. Ljóðupptøkurnar geva ongar ábendingar um nakra ósemju millum flogskipararnar, ella hvat tað var, sum hendi í minuttunum undan vanlukkuni.

Tí er orsøkin trupul at greina, sigur keldan. Flogfarið hjá Germanwings var á veg úr Barcelona í Spania til Düsseldorf í Týsklandi, tá vanlukkan hendi.