So fekk Ísrael sína stjórn

Ísrael hevur loksins fingið nýggja stjórn.

Ísraelska tjóðartingið góðkendi í gjárkvøldið nýggju stjórnina hjá Benjamin Netanyahu - næstan tveir mánaðir eftir tjóðartingsvalið.

Rumbul í tinginum

Samgongusamráðingarnar hava verið torførar.

Ónøgd var í flokkinum hjá Netanyahu, høgravenda Likud, og tjóðartingslimirnir noyddust at bíða í tveir tímar, áðrenn teir endaliga kundu góðkenna stjórnina, sum telir 61 samgongulimir - tann minsti meirlutin, sum kann vera í ísraelska tjóðartinginum, ið telir 120 tinglimir.

- Vit vilja syrgja fyri trygd og stremba eftir friði, segði Netanyahu í tinginum í røðuni, sum varð avbrotin av láturi millum andsstøðutinglimirnar.

Tríggir tjóðartingslimir vórðu so harðmæltir, at teir vórðu tveittir úr salinum.

Fimm flokkar í stjórnini

Fimm flokkar manna ísraelsku høgravendu samgonguna.

Likud er tann størsti við 30 tinglimum, miðhøgraflokkurin Kulanu hevur 10 sessir, høgravenda Jødisk heim hevur átta, og átrúnaðarligu flokkarnir, Shas og UTJ hava ávíkavist sjey og seks limir.