Landsrætturin viðger sakarmál móti BankNordik

Eystari landsrættur er farin at viðgera sakarmálið, sum 20 húski reistu ímóti BankNordik, men sum tey taptu í Føroya rætti.

Tey stevndu bankanum við kravi um, at avtalur um lán, sum tey tóku í 2006 og í 2007, skuldu halda fram sum avtalað, og at bankin hevði ikki rætt til at broyta lánstreytirnar í 2012.

Tey 20 húskini vildu ikki góðtaka dómin í Føroya rætti, og skutu dómin inn fyri landsrættin.

Í gjár varð táverandi privatkundastjórin í BankNordik avhoyrdur, og nøkur av teimum, sum hava stevnt, vórðu avhoyrd av nýggjum.

Læntu 200 milliónir kr.

Í dag halda avhoyringarnar fram, og tá skal stjórin, John Rajani, avhoyrast aftur. Janus Petersen, forstjóri, skal eisini avhoyrast. Hann varð ikki avhoyrdur, tá málið var fyri í Føroya rætti.

Tey umleið 250 húskini læntu umleið 200 milliónir kr. frá BankNordik.

Viðgerðin í landsrættinum heldur fram í dag og til á middegi í morgin. Nær dómur fellur, er ikki greitt.