- Vit kunnu ikki sita hendur í favn

Støðan við flóttafólkunum er so álvarsom, at Lars Løkke Rasmussen, forsætisráðharri, hevur boðsent øllum floksleiðarum í Fólkatinginum til snarfundar um ein hálvan tíma.

Seinasta samdøgrið eru umleið 400 fólk komin til Danmarkar. Forsætisráðharrin leggur dent á, at tey skulu skrásetast í Danmark, hóast fleiri ætla sær til Svøríkis at biðja um friðskjól.

SÍ EISINI Frakland sigur »ja« til 24.000 flóttafólk

Danska løgreglan fekk frammanundan at vita frá Europol og týsku myndugleikunum, at flóttafólk vóru á veg úr Týsklandi til Rødby í Danmark.

- Vit noyðast at hjálpa fólki í neyð. Um vikuskiftið er støðan versnað, og Týskland noyddist, sum umstøðurnar vóru, at lata markið upp, segði Lars Løkke Rasmussen á tíðindafundi seinnapartin.

Danmark fer ikki at sita hendur í favn

Danmark er til reiðar at taka ímóti 100 flóttafólkum, men longu nú eru umleið 400 flóttafólk komin til Danmarkar, segði Lars Løkke Rasmussen, tá hann í gjár hitti týska samveldiskanslaran.

Forsætisráðharrin segði, at tað ber ikki til at senda flóttafólk til Svøríkis, uttan so at svenskir myndugleikar góðtaka tað.

Lars Løkke Rasmussen leggur dent á, at Danmark er ikki partur av evropeiska flóttafólkapolitikkinum, men er partur av Evropa. Tí kunnu vit ikki sita hendur í favn, sigur hann.